THU UM MITE NISIM TAVUAN

Posted by zolengthe on July 24, 2007

By Rev.Gin Khen Mang  

Pasian in a tapa khat bek a piak dongin leitung mite hong it hi. Tua tapa a sang mite thu-um kici hi. Thu-um mite in, Lai Siangtho honggen mah bangin a tawntung khuamial sung panin a tawntung khuavak sungah a lut khinsa mite a hihi. Tua a hih manin thu-um mite in, Pasian khuavak a tangsak dingte i hih manin, nisim nuntakna ah zong thu-um lo mite tawh ki lamdanna khat hong om pah ding hi. Thu-um mi khat hi khin ing cina pi-in, ama nuntakna sungah ki lamdan’na le Pasian deihna banga gamtatna hong gahkhiat theih kei le amah pen thu-um mi tak tak ahi hiam? cih kitel dot huai kha ding hi.

Tua a hih manina thu-um mite in leitungah tawmvei inuntak sungin, izuih ding pawlkhat a nuai a bang hi ding hi. Hih thute ut le zuih ding, i ut kei le zuih lo ding cih hi zenzen lo in, thu-um mi khat in peel lo a zuih ding ahi hi.

1. Thu-um mite in nisim Pasian min phat ding tavuan nei hi.

Lai Siangtho sungah Pasian iphat ding ziate hoih takin hong ki vaikhak hi. Kahla 3:23 sungah “Ama hehpih na thuphate zingsang simin thak suak twntung hi.” na ci hi. Late 68:19 na sungah “Thupha tampite hong pia Topa phat un.” na ci hi.

I nisim nuntaknate enpha zel leng, Pasian hehpihna hang bek tawh a ki nungta ahi hi. Zingsang tho in, na dailen theihna, an nanek theihna te, nasep maban tuamtuam na zop theihnate khempeuh in nang ut thu le nang hanciam zawh thu hi zenzen lo-in, Pasian hong hehpihna ahi hi. Tua a hih manin, nisim in, Ama min i phat ding pen i leiba hi zaw lai hi.

2. Thu-um mite in nisim in Pasian kammalte sim den ding tavuan nei hi.

Lai Siangtho pen Pasian hong hopihna a hih manin, pel lo-in sim den ding pen i tavuan liankhat ahi hi. Pasian eite tawh maitang kimu a hong hopihlo a hih manin, ama hong hopihna izak theihna dingin, Lai Siangtho mah sim kul ding hi.

Nungak le tangvalte lai a kikhak uh ciangin, a ngah hun peuh ciangin sim ding kal ngaklah mahmah uh hi. Khat vei a sim khit ciangin, sim kik zel in, hoihtak in tuamkep pahlian uh hi. Bang hang hiam cih le tua lai a khak a lawmpa/nu pen it mahmah le ngai mah mah a hih man hi. Pasian i it a ingaih le ama hong piak Lai Siangtho ki sim nuam ding hi.

Sawltak 17:11 na sungah, Laibu gelhpa Luke in, Berea khua pawlpi mite pahtawina kam kizang hi. Bang hang hiam cih le amaute in Pasian kihilhnate a zak uh ciangin, man hiam man lo hiam cih a theih tel nading un, Lai Siangthote enpha uh hi, na ci hi. Tua tawh ki leh bulh in, ei lam a mipawl khatte hong kipan tawmin, Pasian in hih bang deih hi, Lai Siangtho in hi bangin gen hi hong ci tawm keei zong om thei hi. Hih banga thucianlo pi thu mawk gengen na panin, a omsa thu-um mi pawl khat zong hong lung-am sak thei kha ding uh hi. Tu lai thu ging Kha Siangtho tawh ki dimna, kamtuam pauna, kha nasepna hanga tuukna cihte kha lam thu ah pici’n na kisa kha in, mi tampite in bawh hehu thei uh hi.

Lai Siangtho sung hoih tak in entel, simtel le uh cin, tua bang kikhemna mawkmawkte in hong zolo ding hi. Tua a hih manin thu-um mite in nisim in, Lai Siangtho Pasian kammal tawh kivak tawntung dingkisam pha mahmah ding hi.

3. Thu um mite in nisim in thunget ding tavuan nei hi.

Lai Siangtho lui le thak sungah thungetna tawh kisai thu tampi kimu thei hi. Thu inget ciangin Pasian i hopihna hi aa, i deihna i kohnop khempeuh ki ngen thei hi.

Tua a hih manin Pasian tawh hun tampi zang a kihona, Pasian tawh ki pawl khopna anei te in kha thu ah picing mite a hi hi. Tua hi a thu-um mimal khat ciat innisim i nuntak na sungah thungetna hun hoihtak zanga Pasian tawh nisim a kiho tawntung ding ih tavuan lian khat a hihi.

4. Thu um mite in ngak ding tavuan ih nei hi. (Prov. 8:34)

Thu-um mite in nisim in Pasian tawh kiho in, Pasian tha tawh kalsuan in, Pasian tha ngak gige a i om kei le ze-et na sungah baih takin na lutkha ding uh hi. Tua ahih manin Lai Siangtho in thungen un la ngak un ci hi, Tua ban ah Topa Jesu hong pai ding zong a ngak gige ding te ihi hi.

5. Thu um mite in nisim in teci pan ding tavuan nei hi.

Sawltakte in nisimin Pasian adingin teci pangin ki khawm uh ahih manin, nisim mahin mi tampi kibehlap hi. Thu-um mite nuntakna mahmah in teci panna ahih ding kisam hi. Bang hang hiam cih le kam tawh i gen sangin igamtatna in thu gen zaw hi. Tua ahih manin, i nuntakna le i kam mahmah tawh teci pang ding te i hihi. Hih pen Topa hong sawlna a hih manin, eite in kinawl khin theilo hi. Teci pang ngeilo thu-um mi pa pen letsong ngah lopa hi ding hi.

6. Thu um mite khat le khat ki hansuah ding kisam hi.

Thu um mite khat le khat tha kipia in ki hansuah ding ahi hi. Pawlpi sungah hansuahna tha kipiakna kisam ciat hi. Mite khat le khat kitai, kikha-sia sak ding hi lo zaw in, tha ki piak ding hi zaw hi.

7. Thu um in nisim in singlamteh puak ding tavuan ih nei hi. (Luke 9:23)

Eite puak ding singlamteh in Topa Zeisu kikhaina singlamteh pen hi zenzen lo hi. Nang adingin singlamteh khat na puak kul ding hi. Hih singlamteh puakna in leitung ci le sa deihna te nialin Kha Siangtho deihna lam zuih zawkna a hihi.

A tawpna ah thu um mi khat ciat-in nisim in PASIAN PHAT, LAI SIANGTHO SIM, THUNGEN ni lohte, Pasian thu tawh kituak a nuntakna ding le Topa hong pai baih dinga ngakte hi in, mite tungah TECI a pang thei tawntung te, mite HANSUAH thei le SINGLAMTEH pua tawntung te hi leng, imimal nuntakna mahmah ah Pasian in thupha hong pia ding hi. Tua khit ciangin ih innkuan sung, I khua sung le i gam sungah Pasian thupha hong tung pelmawh ding hi. Hih thupha tampite hong piak theih na dingin Pasian mi zat ding nang na ut hiam?.

http://www.zomi.talkspot.com ~-~-~-~-

JORDAN GUNPI BANG CI KANTAN DING? §

JORDAN GUNPI BANG CI KANTAN DING? §

 

Joshua Chapter 3

 

 

 

Thu Patna     

 

Egypt gampan hong paikhia Israel mite gam sungah kum sawt sim hong zat khit uh ciangin tu in Pasian kamciam Canaan gam hong lut ding uh hi ta hi.A luah ding uh Pasian kamciamsa gam luah dingin hong kiging khinta uh hi.Ahih hangin gam a laakma un peello in ahih ding leh a phutkhak ding uh thu lianpi khat a mai vuah ngak gige mawk hi.Tua in Jordan gunpi kantan ding ahi hi. Israelte’n Jordan gun kantan ding a kithawi hun uh pen anlaak hun (April kha) hi ( 3:15) .Tua hun laitak in Jordan gunpi nak lam aom tuikhalte tuimang ahih manin tui khang mahmah in mihng kantan zawh ding hilo hi (Ref: Jamieson,Fausset,and Brown Commentary; Keil and Delitzsch Commentary on the Old Testament; Adam Clarke’s Commentary; Albert Barnes’ Notes;Wyliffe Bible Commentary  leh a dang commentaryte na simbeh in.) Tuikhang lo hi leh Israelte’ kantanna mun pen pi 100 (100 feet) bek hi a, anlaak hun in tuikhang lua ahih manin a zaina taikhat ( 1 mile) bang pha hi.Tua ahih manin anlaak hun in a zah sawmnga val bangin lian zaw  hi.Jordan kantan nadingin Pasian mahmah in na lamdang a sep kei leh a hi theilo ding hongsuak hi.

 

Joshua bu pen Lai Siangtho sungah a lungluthuai mahmah bu khat hi a Joshua makaihna tawh Israel mite Canaan gam a lutna thu kigelhna bu ahi hi.Hih laibu pen anuai a bangin khenpi thumin kikhen thei hi.A masa khenpi 1-12 in Israel mite’ galdona leh gamlaakna thu, khenpi 13-22 in gamlaak khitsate minamte teenna dinga hawmsakna thu leh 23-24 in Joshua sihkuan thu vaikhaknate cih bang ahi hi. Joshua bu sungah Pasian na sepna lamdang tampitak aom sung panin Israel mite Canaan gam lutma deuh a a tuahkhak  thu  kikum khawm leng ka ut hi. Hih thupen Jordan gunpi kantanna hi a khenpi 3 & 4 sungah kimu thei hi.

 

I.                  Thu kipulaak Etciankikna (3:1-13)

 

A.    Tona (changllenge) kihel (vv.3, 4)

 

Pasian in Israel mite’ zuih ding thu nih na pulaak a, hih tua thute ei adingin la thei leeng tukum sung ii kalsuanna ah phattuampih mahmah ding hi hang.

 

1.      Pasian Ngak Ding

 

Khenpi 3 sungah Thuciamna Singkuang 7 vei bang na kigen hi. Thuciamna Singkuang pen Biakbuk sunga kizang van khat hi a Pasian ompihna leh Pasian vaangliatna lahna hi.Theih ding thu khat ah Israel mite lak ah Pasian in a ompihna hong ensak bek thamlo in Thuciamna Singkuang a kikhin ciangin amau zong kikhin in dingkhia ding ci hi.Thu dang khat in gen leeng Pasian a tat a a kikhin ciangin Israel mite zong kikhin khia ding cihna hi.Pasian gamtatna ngak ding ahi hi.

 

Tua mah bangin tukum sungah ii mailam ding bing cip in cihna ding theilo in ii om hun ciang Pasian makaihna kisam hanga, Topa in ii kim ii paam ah hong gamtatna (the movement of the Lord) telcianin ii kalsuan ding thupi ding hi.Tua ahih manin Pasian zia ngakin Amah mah en kawmin gamtang kalsuan leeng Pasian in ii nisim kalsuanna ah hong makaih takpi ding hi.

 

2.      Pasian zui ding

 

 Na omna pan un ding khia-in na zui ding uh hi. Pasian zia ngak bek ding hilo in Israelte mahmah a omna munpan in kikhin khia-in dingkhia ding uh hi.Pasian mahmah in na hong sep a hong gamtat ciangin ei lam pan in ii gamtat na ding thu tampi tak hong om kha ding hi. Pasian mah zuih ngiat a  kalsuan ding ahi hi.

 

Pasian ii theihna ciang bek tawh hi theilo dinga ii omna mun pan (tu laitak nop ii sakna mun zong hi thei) paikhia in tukum sungah Pasian mah zuan ni. Thuciamna Singkuang kikhin ciang zui dingin Jordan gunpi khang mahmah kantan ding cih pen Israel mite adingin baih khollo kha ding hi. Ahih hangin a zuihloh un Jordan gunpi kantan ngeilo ding uh hi. Tua mah bangin Pasian nungzuih pen hong baih khollo kha ding hi.Ahih hangin zuih zawh ding hanciamin tukum sung peuhmah tha saanin kalsuan leeng gualzawhna in ii mai ah ei hong ngak gige hi.

 

B.    Sawlna (Command) Kihel (v.5)

 

Nomau mahmah kisiansuah tawm un. Pasian in na lamdang lianpi a bawlte hoihtak a muhcian theih nading un kisiansuah ding Israel mite tungah sawlna ahi hi. Maikum sung Pasian in ii nuntakna ah na lamdang lianpi hong laknuam hi. Pasian na lamdang tampi ii muh theihlohna dingin mawhna khialhna ii bawl tampi om kha ding hi.Tua ahih manin tukum sungah Pasian na sepna lamdang tampi ii muh theih nadingin ii nuntaknate ki-enpha in ei leh eimah kisiansuah tawmin Pasian maipha zong ciat ni.Kumlui sunga Topa’ deihloh na tampi ii sepkhakte kisikkik in Topa’ tungah thuum lehang Aman hong maisak ding hi (1John 1:9).

 

C.    Ki-apna (Commitment) Kihel (vv.9-13)

 

Pasian in na lamdang a bawl ciangin mi tungah kinga lo in Aman hih ziau lel hi.Pasian mahmah in Israel mite tungah na lamdang lianpi bawl ding kiging khin a Israelte’n Pasian hih theihna muanga a pumpi mahmah uh Pasian tungah a ki-ap ding uh thupi hi.Muang ngam in ki-ap zo in hi peuh leng Pasian in eite adingin geel kholhsa thuhoih tampi nei khin hi (Jer.29:11).

 

Tua ahih manin tukum sungin Pasian muanna tawh kalsuan in Aman na lianpi hong sem ding hi ci in kalsuan lehang zing ciang bang ne ding,zing ciang bang ka tuak tam kici nawnlo dinga maikum sung ii tuahkhak ding ii mai aom Jordan gunpi Pasian tha mah tawh kantan zo ding hi hang.

 

II.                Na lamdang lam-en ding (3:14-17)

 

A.    Buaina

 

Eite in ii mailam kalsuan nading ii ngaihsut ciangin kilungbuai mahmah thei hi.Mihing ngeina ahih manin ahi ding mah hi. Lei kidawh lah omlo,tembaw lah omlo in Israel mite’n a kantan ding uh Jordan gunpi a muh uh ciangin lungkia  mahmah kha ding uh hi.

 

Eite in zong ii buaina khat peuhpeuh bang ci zawh zawh ding cih sangsik in uanggen in liansak tektek zaw thei lungkia dipdep kha thei ding hi hang. Canaan gam en a a pai mi 12 te lak ah 10 te in amuh mite uh bang ci zawh ding cih sangin uanggen in kihtak bawl uh a a kim a paam linglongsak uh hi. Tukum sungin ii buainate liansak lo in neuseek zaw in a phisianna (solution) ding lam ngaihsun zaw ni. Mite in buaina ki-en in Pasian in buaina zawhzawh nading geelna neikhin hi.Eite in lampi dang om kei ii cih laitak in Pasian in om mah hi ci hi.

 

B.    Geelna

 

Pasian geelna in siampite’n Thuciamna Singkuang puakawm in tui a siik uh ciangin tui kikhen ding cih ahi hi.Thu dangin gen leeng siampite’n tuisiik kei leh gun tuipi kikhenlo ding hi.Tua ahih manin Pasian geelnate ii sinkhak a ii ciapkhak theih nading ii muh ngei nailoh hong tung ding kumte ii nawkna ah ii Jordan gunpi a kikhenkhap theih nadingin Pasian geelna omte thei kawmsa in ii upna liansakin kalsuan ngam ding thupi mahmah ding hi. Siampite’n Pasian thugen umlo in kalsuanlo hi leh tui kikhen ngeilo ding hi.

 

C.    Gamtatna

 

Saklam pan hong luangsuk tuite khawl in  Adam khuapi dongah kilom in om hi ci hi.Israel mite kantanna mun pan in Adam khuapi dong pen tai 20 bang a pha hi a, Pasian in Israel mite nuamtak a Jordan gunpi a kantan theihna dingin a kicing mahmah lampi tanzau honsak hi.

 

Tua mah bangin Pasian muang ngam in ii kalsuan nak leh eite nuntakna ah Pasian hong gamtangin tukum sungin ii muh ngei nailoh na lianpi tampi ii nuntakna ah hong sem ding  hi. Pasian hong gamtang taktak leh eite lametna sangin na thupi zaw hong sem ding hi.Lai Siangtho lui sunga na lamdang tampi tak a bawl Pasian pen a kikhel ngeilo nang leh kei in tu ni a ii neih Pasian mah ahi hi.

 

 

Thu Khupna

 

Sanggam aw a tunga ii gensa thu tampite hoihtak in ngaihsun ni.Topa vaang kiamlo in ahih theihna kikhello hi.Tukum sung ii kalsuanna ah ii tuahkhak ding leh ii phutkhak ding Jordan gunpi in ii mai ah hong ngak gige a, ahih hangin Topa muanna tawh kalsuan in Ama zia leh tong ngakin upna tawh kalsuan leng Aman eite nuntakna ah na lianpi tampi hong sem ding hi. Hih dotna nang leh nang in na dawng tawm in.Na Jordan gunpi bang ci kantan ding na hiam? Topa hong gensa thu tampite encian phakik in, Topa’ tungpan na lianpi lam en ni. Amen.

 

 

KHANGNO TE DINMUN

KHANGNOTE’ DINMUN
 Rev. Lian Do Nang   
   

Leitung hi ta le vantung hi ta le khangnote lo in ma kipang thei lo hi. Khangnote pen khantohna tha zungpi hi. Tua ahih manin Khristian makaite in khangnote bangci makaih in bang ci pattah leng hong khua suak ding hiam ci in lampi tuamtuam tawh ma napang uh hi.    

1780 kum in Robert Raikes in England gam sungah Sunday School na phuan khia hi.   Tua nasepna England gamahhong ki zel tektek in 1795 kum ciangin hong picing mahmah hi.  1806 kum ciangin Baptist Youth Missionary Society in New York ah phuan khia hi.  Tedim gam sungah 1965 kum ciangin  Gamlai Youth Leadership Training ah TBA-CE Union Youth Secretary dingin Sia Thuam Khan Khup na teel uh a, hunbit a sem masa pen a hihi.  EBC Pawlpi in 1991 kum Tamu khua a EBC Gambup kumcin khawmpi ah director  minin kiphuan hi. Nasepna tangzaina tawh kizui in ma kinawt theih semsem na ding in department tawh kalsuan zawk dingin kum 2000 Tedim EBC  Gambup khawmpi pan kikhensat hi. 

A tunga thute i et ciangin khangnote vaihawmna khat peuhpeuhah kihel loh pha mawh le tha zung pi cih ih mu thei hi. Tua hi a  hih khangno kipawl na kiphutna in ngimna tampi tak nei-in gen khin zolo ding hi hang. Tua ngimna thu bulpite in :

1.    Jesu Khris Honpa le Topa a san’ ding. (piangthak ding)
2.    Khris  makaih na nuai-ah a ki-ap na ding.
3.    Kha Siangtho makaihna tawh khantohna ding.
4.    Pawlpi mi hihna ding le Khristian nungzui citak hihna ding.
5.    Mission nasepna le pawlpi nasepna te-ah kuhkal taka kihel nading.
6.    Pasian gam zaina dingin neihsa le hunte zat’ngam nading.
7.    Thu-um lote ading limpha hih nading.
8.    Pasian gam ading kipumpiak ngam nading ahi hi.

Khristian makaite, nu le pate in khangnote khantoh nading, picin nadingin tavuan lianpi nei hihang. Tua hi a, Khangnote in:

1.    Pasian man taka biak theih na ding.
2.    Thuman thutak theihtel na-ah khantoh nading.
3.    Thu um lo te mai-ah limpha hih nading.
4.    Gamtat luheek kikhela, Pasian ki-uk sak nading.
5.    Sepna bawlna khempeuh ah Pasian tung kingak ngam nadingin makaihin pantah ding hi.

Tua banah galkap khat in galkap siam a suah nadingin gimna, tawlna le haksatna tampi thuakin lungduai takin a om ciangin galkap nasem siam khat hong suak hi.  Pasian gam nasem dingin zong kisin kholh kulin mimal mahmah siamna kivaknate neih kulin zattheih ding zong  kul hi. Kha lam dinmun ah pianthak ding a kul mah bangin leitung thu ah zong siamna kivakna neih kulpha mahmah hi.

Tua hi a, khangno khat in:
1.    Pianthakna kician neih kul hi.
2.    Pasian hehpihna hangin lungdam den ding.
3.    Vai khempeuhah Pasian muang ngam ding.
4.    Pasian tung kinga bup ding.
5.    Thungen den ding.
6.    Piangthak lote tung teci pang ding.
7.    Khang mangthang veina itna nei ding.
8.    Lai Siangtho simin ki-ap den ding hi.

Pianthakna kician neih a kul mah bangin leitung pilna siamna theihnate zong kisam hi. Khangno khat in:

-    Amah le amah kimuan kul hi.
-    Gualhuai ding.
-    Khangno te vei ding
-    Theihsiamna nei ding lungnem ding.
-    Tupna neiding, hehpoih lungsim paai ding.
-    Maitai den ding.
-    Midangte tawh kizop siam ding.
-    Na geel tawm thei ding.

Thu um khangno khatciat in ih nuntakna ei a hilo,  Pasian a ahi hi. Khangno hoih le khangno lawhcing khat ih suah na dingin  thu tampite lak-ah tawm en ding hihang.

1.    KHANGNO HUN MANPHA MAHMAH HI.

Mihing khat nuntakna sungah a thupi penpenin hun ahihi.  Hun pen thaltang lot bangin hong khenginhong paisan ziau hi.A manpha khangno hun ih zat theih leh tupna tangtungin gualzawhna kingah hi.Hih khangno hun pen thahat ahih mah bangin sepna bawlnate ah manlang in seplah bawllah nei lo hi.Lai Siangtho sungah I et teh Pasian in nasem ding mi a zon ciangin a thahat, a citak, khangnote mah na zongin na  kan hi. Deihna khem peuh ah kisuanna om lo a zatngam nading a hihi  (John 21:18, Joshep, Samuel, Daniel, etc.).  Kisikna om loh nadingin a manpha khangno hun a manpha taka zat ding thupi hi. Ecc.12:13.

2.    KHENSATNA  KICIAN  KISAM  HI.

Mi khat nuntakna asia apha a, a khel bulpi in khensatna a hihi. Muhkholhna le gelkholhna thupi mahmah hi.  Ut thu peuha geela  ngaihsut ding lauhuai mahamh hi.Lai Siangtho sim loh kingak nading dang om lo hi. Leitung thu ut peuhpeuh thu-ah kinga leng kikhial den hi.  Joseph in akhial ngeilo Pasian kammal tungtawnin khensatna nei ahihmanin  thuman lo in khih zolo hi ( Gen.39:9c). Daniel in abiak Pasian sang tawmkhat lauhuaina te lau het lo-in ding ngam hi.  Esther kumpinu in hangsan takin a khensatteh Jews mibup in suahtakna ngah hi.
 
3.    MAKAI DINGIN  KIGING KUL HI.
Khangno khat in mailam ah ipuak ding na lianpi khat in makai hih ding ahi hi.Lungmuang lua-in bangmah geelloin ki om thei hi.  Tua hunteh supna tampi kingah thei hi. I liangko tungah I puakding van lianpi kisuat ma-in kiging kholhin zon dingte zongin, sin dingte sinin kithoi khol ding hi hang.

4.    KISIN  KHOLHDING  KISAM HI. 

Nuntakna khat lawhcin ding cih pen in sinsakna tungtawnin mu thei hi hang.  Hih thu pen Khristian huang sung thupi ngaihsut lo tamta ihih manin lauhuai mahmah hi. Kisin hun sung-in ze-etna le lungkiatna om thei tawntung hi.   Lungkia lo-in thasante in  ma tunin a gah lo hi. Siamna le theihna te hong khangsak na hi zaw hi.

    Khangno khat nuntakna hun pammaih mahmah a,  manpha taka zat siam ding thupi mahmah hi.Pasian gam le I gam in nang hong ngakin hong lunggulh hi cih phawk tawntung ding hi hang. Kei kisam lo hi nacih leh na manphatna thei lo hi ding hi teh. Topan hong ngakin khuadak hi cih mangngilh lo ding hi hang. Topa’n thupha hong pia ta hen. 

NUNGAK LAI TANG VAL LAI LAWMZONG TE ADING

KHANGNO LAWM ZON’ DAN. PDF Print E-mail
Written by khup   
Thursday, 05 July 2007
KHANGNO LAWM ZON’ DAN. (Prov.19:14)
Rev. Thang Khwm Pau

20th century hong kipat a kipanin, leitungah nungak le tangvalte ki-it, kingaih le kiteen zia tampi hong kikheel mahmah cih itheihsa a hihi. ‘Innkuan’ cih kammal pen pasal in zi a neih lo in a hih kei le nungak in pasal a neih loh in a piang tawm mawkmawk thei hi lo hi. Nuntak zia kithak patna a hih mah bangin innkuan sung a nop theih na’ng in Pasian deihna tawh kituak nungak le tangvalte in i zon ding thupi masa hi.

I. Pasian patkhiat innkuan ( Pian.2:1).

Pasian bawl na khempeuh hoih mahmah hi napi in, mihing (pasal) adingin kisam a sak khat na om hi. A kithuah pih ding, a huh ding, lungsim kuppih ding amah bang khat mah kisam hi ci in Pasian in thei hi.Tua hi a tua kisapna a thei Pasian lung nuamlo-in, pasal Adam adingin a kisapna Pasian in vaihawm sak hi. Pasian tavuan piak a hi mihingte tawh leitung a kidim nang, a pun na’ng le leitung a uk na’ng uh numei lo-in piangthei lo a hih manin Pasian in pasalpa a huh ding, pasal pa’ kisapna a dipsak dingin ( 1 Tim 2:14) numei na bawl sak in, innkuan cihna bawl hi. Hih pen Pasian hong patkhiat a hihi.

II. Pasian piansak zia.

Zomite in, numei khat kum sawmnih bang a phak ciangin, nungak picingin tuata, pasal khat kum sawmthum a phak ciangin tangval picing thei dingin ki ngaihsun hi. Pasian in mi khat a pian khit nak le ‘ lawm ngaih theihna’ cih hong bawl sak hia, numei-pasal in i neih kim thu khat a hihi. Hong ki ngai maw, ngailo cih thu hi masa lo-in, vaangngaih cih khat kinei masa ciat hi. ‘ Picin’ hun’ a tunma in, kikhel hun thupi tak khat pen numei le pasal pumpi sungah om hi. Hih hun thupi mahmah le a lauhuai mahmah hun hia, numei khuaval sim khat le pasal om mawh sim khat hong kizop khak le bel “aman lian” hi ding hi. Tua hi a it ngaih le duh ngaih cih om a hih manin, tulai khangnote ki dop mahmah ding kong thei sak nuam hi.

Hong it taktak le hong iplah lelte theih telna dingin,
Hong it taktakte in.
• Zahtaakna nei.
• A hoih hong deihsak,
• Hong ngak zo hi.
• Na innkuante hong it pih ding hi.

Hong iplah lelte in;
• Hong maingal in hong ngapthawh gawp ding hi.
• Hong susia nuam lel ding uh hi.
• Hong kin tengtung ding hi.
• Nang bek hong tang it in na innkuante it lo ding hi.

Pawl khatte in na maitang bang hong en ngam lo zawzen dinga, lugsim tak tawh hongit peuh na hi thei ding hi. Pawl khatte leuleu in, ngak lah lua pong mawk uh a hih manin, kam zol in, ‘phalbi khuavot sung hi thei peuh le’ hong ci henhan ding uh a, kin tengtung ding uh hi. A ki-kin luat le a hoihlo lam hi zaw kha ngel ding hi. Tua hi a, na kin luat uh le ‘leep se ding’ hi peuh mah lo hi. Numei na hih a thupina le pasal na hih thupi na kepsiam in. A dikdiak in numei te na kidop siam kei le khat vei khialhna in khantawn minsiatna le maimawlna hi thei ding hi. Numeite in, na numei hihna uh hoihtaka kep ding kisam hi. Pasian in a siangtho a hong bawl hi in siangtho tak mah a kep ding a hih lam mangngilh kha het kei in.

III. Pasian piak kholh thukhunte.

Lai Siangtho lui Piancil 24 sungah i muh mah bangin tuhun Lai Siangtho siksan in nei le cin na khial ngei kei ding a, innkuan nuam na nei thei ding hi.
1. Upna kibang (piangthak le piangthak) teel in.
2. Pasian muang in.
3. A pian zia, gamtat luheek ngaihsun in.
4. Pasian hong piak lung pilna zang in.

1. Upna kibang teel in: (2 Cor. 6:14, 15)

Tui leh sathau aki hel theih loh zia, sathau suangso-in la, tui vot sung le cin, tam geen kullo-in thei ding hi teh. (Pian. 24) ah Abraham in a tapa adingin, mihing nuntakna tawh a pasiante peuh uh a bia, numei pasal ki thuahna a thaangtat,
Canaan mite tawh a ki teen ding deih sak peuh mah lo hi. Tua ahih manin, amau om zia kitheisa mite kiangah a mo ding la sak hi.

(2 Cor.6:14,15) “hakkol ki banglo” a cih pen, hakkolpi a gen hi lo-in, tua hakkol a pua ganhing ki banglo a genna hi zaw hi. Van a pua khawm ding, nasem khawm dingte ahih mah bangin, na zi ding, na pasal ding zong na khan tawna, nasep pih ki kholhpih ding ahih mangngilh loh ding thupi mah mah ahih na hong hilh hi. Tampi gen ta kei leeng Lai Siangtho sungah hih mite: Samson (Thukhente 14:3): Solomon (Kumpi Masa 11:4 Pasian umlo a zite in, a lungsim ki khel sak zo zen hi.) Ezra 9,10, Neh. 13: 23-27, Malachi 21:11,12 te hoihtak in sim in.

2. Pasian Muang in:

Mihing nuntakna i suah tung a kipan in, khat tang a ki nungta hi lo-in, mi khat tunga ki nga nuntakna ahi hi. I neu lai-in i nu i pa tung i ki nga a, annel tuidawn leh puansilh nikteen ding amau hong sik, hongguat ding bek i ngak hi. Tua mah bangin nuntakna nak ahi Pasian tung na khempeuh i ngak ding ahi hi. (Pau 3:5-7)

Pasian na muan le na “vai” Amah ap le cin, lungdam tak in, a hoih pen hong panpih ding hi. (Pau. 19:14) Leitung inn leh lo te pate tung pan hi-in, zi pil ahih leh Topa bek in, hong pia thei hi; ci hi. Zi hong pia Pasian na ci lo-in “zi pil” na ci sese hi. “A pil” ci ahih man in, a “hai” om hi-cih ki mupah hi. Laitaan leh Degreee tampi neihna cih hi lo-in, ciimna, mai khuat theihna cih ahi hi.

3.Gamtat lu heek ngaihsun in:

Na lungtang hong kheisak (operation bawl)dingin zu khamkham siavuan peuh na muang zo ding hiam? A tei, a siam, a minthang siavuan na teel zawk ding kong um hi.
(Pian. 24:13,14) a ki niamkhiat, na seempa lungsim bang a nei numei khat om hi. Ki niamkhiat, na sep hahkat numei, numei ahihna siang tak a, a keem nu ahi hi. Nang zong tua bang hi nuam in.

4.Pilna zong in:

Na khat na lei ding ciang; na teena ding mun na teel ciang leh pasal/zi ding na teel ciang Pasian hong piak lungsim zat ding ahi hi. (Pian. 24) ah Issac zi ding in Rebekah a zon’ nang mun (24:3,4,10) thei-in, a muh theih nangin Topa’ huhna na ngen hi.

Na lungsim Topa’ khut ah ap in la, nang theih tawmna, lim leh na lamdang pian peuh na lamet leh Pasian mai-ah koih masa kei-in. Eliezer in Rebekah mai-ah tailo-in, a tuidip lai tak hoihtak in en gige hi.

Pasian a it piangthak na muante tawh ki-kum in la, advise ngen in. (v.49). Pasian a it, innkuan na hih ding thupi a, Pasian kihta uh ahih man in, Lai Siangtho hilhna mang nuam pah ding uh hi.

Hih a tung a thute thupi ngaihsut in, Pasian ki makaih sak le cin, na khial ngei kei ding hi.

Source: http://www.zominet.com/zomiforum/viewtopic.php?t=11

Last Updated ( Monday, 20 August 2007 )

“Myanmar Mission Sunday or Judson Sunday”

“Myanmar Mission Sunday or Judson Sunday”

{Matt. 28: 19. Mk. 16: 15; Lk. 24:47; John 20:21; Acts 1:8, Is. 6:8}

      Adoniram Judson te nupa Yangon ong tunni pen July 13, 1813 kum hi aa, July nipi nihna pen “Myanmar Mission Sunday” or “Judson Sunday” ci-in phawk na leh mission nasep hanthot na kinei ciat hi. 

Judson Thu Atomin:
      The Great Century (1800-1900) hun sung South Asia, Far East, Pacific Tuikulh te ah Pasian thu na tung hi. Tua nasemte lak ah Judson pen hahkat takaa nasem khat ahihi. Kawlgam atungmasa pen hi lo zaw in America gam pan aa amasa pen missionary ahihi. 

-1788 kum in Massachusetts ah suak hi. Apa pen Congregation Pawlpi te pastor ahihi. Brown University akah laitak in alawm Jacob Eames pen Pasian umlo (atheism) hi aa, Judson zong alawmpa thuhilh na um in, Pasian umlo hi. Ahizong in anu le apa te lungkham lua in nakpitak in thunget sak hi. Alawm Samuel Mills in William College pan “Haystack Prayer meeting” ah thunget sak hi. Asawt lo in Khasiangtho in Judson lungsim hei aa, piangthak in thu um mahmah khat ongsuak aa, missionary kuan ding in Laisiangtho sangkah hi.
- 1812, Feb kha in khamangthang leh gammail avei Ann (Nancy) tawh kiteng aa, a kitten zawh ni (13) ni ciangin “Caravan” tembaw tawh India gam zuanin hong kuan kha hi. Lamkal ah tuiphum nathu kantelaa, “Tuitheh leh naupang tuiphum” man lo hi ci-in Calcutta atun ciangin Serampore ah tuisung kiphum phakik hi. 
- British, East India Company te in India gamsungah America te omding phallo ahihman in, Kawlgam lut ding “Georgiana” tembaw zui in Yangon ah 1913, July 13 ni in hong tung hi.
- Yangon khuapen tuahun in lampite buanvive hi aa, inn neuno vive hi in vok leh ak khoi in haikung, ungkung sangte nuai ah tenguh aa, tho hang in natna tam mahmah hi. Kumpi te phalna angah khit ciangin Kawlte innzat dan in inn lam hi. Kawlpau, Kawllai leh Pali dong in sinpah aa English-Brumese Dictionary leh Burmese-English Dictionanry bawl pah hi. Kawl lai tawh a bawl masa peh ahihi.
- 1816 kum in New Testament tei kipan hi. 1817 kum in Kawllai printing press tun aa, Kawllai tawh akinei masapen ahihi. Thuhilh lai-pamphlet (tract) khenin hawm khia hi.
- 1819, May kha in tract laidal te a simnapan, thu-um mi masa U Naw tuikiphum hi.
- 1820 kum in atacil kha 6 apha pan Roger si aa, azi Nancy zong damlo in America ah zato kah hi.
- 1824 kum in, a khatvei na British leh Kawlte galkido uh aa, Kawlte in thongkia sak hi. Thongsungah azi in a Laisiangtho teisa te lukham sung guangin puak sim aa, zomto thei hi. Thong sungah asi ding zah in bawlsiat na thuak hi. Tuahun sungin azi damlo aa, atanu Maria nawineek ding omlo ahih man in khuasung nupi nauneite kiangah nawi simsak koikoi hi.
- 1825 November in suaktasak aa, British tawh galkilem na kamphen in zang hi. A khualzin kal in a zi Nancy si aa, a sawt lo in atanu Maria zong si hi. Judson in nasa lua in, gamlak ah tawlpi khat omcip hi. Nakpitak thu a nget khit ciangin a nasep zom kik hi.
- 1834 kum in meigong nupi Sarah Boardman tawh kiteng aa, ta (8) nei in (5) nungta hi.
- 1836 kum in Kawlgam atun panki pan tuikiphum vekpi (1143) ngah hi.
- 1840 kum in, KawlLaisiangtho (OT/NT) atei manta aa, print kipan hi.
- 1845 kum in, azi Sarah, America ah zato kah ding in ciah aa, lamkal St. Helena ah si in, kivui pah hi.
- 1846 kum in Emily tawh kiteng aa, tanu khat nei hi.
- Judson aci dam nawnlo in anoptuam nading tuipi tungah 1850 April 3 ni-in zin khia aa, a cidam lo azi in, inn ngak hi.
- 1850 April 12 ni-in Judson si aa, tuipi sungah kivui hi. Emily leh atano teng America ah ciah aa, kum 3 khit ciangin azi zong si leuleu hi. 

Judson ih vision: “Milim biakna leh tattung munte ah Singlamteh akiphuh hun   hong tung ding hi.” ( Is. 11:9, 45:23-24, Ps 2:8-12, 22: 27-30, Hab. 2:14. Dan. 2:35, Phil. 2:10). 

      Judson nasep na in America te thupha konghon na khat ahihi. Amaban azomding Khasiangtho in Zomite lungsim honghatsak hi. Mapang ciat ni. Amen. (Deu. 28: 1, Rom. 10: 15, Nah. 1: 15). 

Laiat,

Khazih Sungah,

Sia Kam Do Thang

Mihing Hamphatnate Khuavannuai Tangkona (Universal Declaration of Human Rights )

Mihing  Hamphatnate Khuavannuai  Tangkona (Universal Declaration of Human Rights )

A tei khia: Tual Khan Suan(Suanpi)

Proof-reading : Rev. Khup Za Go

Thu honna

Mihinga minpiang in pianpih vaang, kuamah in a phiatkhiatsak thei loh leh a kikim ciat hamphatna nei ciat hi, cih kisansakna pen leitunga suahtakna, thumanna leh kihotheihna  bulpi ahi hi.

Mihing in a ngah ciat uh tua bang hamphatna kithusimsak lohna, kisimmawhsakna in  mihing lungsim ngaihsutna  kisiasakin siahuai taka  gamtatna dong  tun thei a, mihingte khempeuh in upna leh ngaihsutna bang pulakkhiat theihna, launa patauhna pan suakta a, cihmawhna pana suahtakna pen mi kim in   a lunggulh  lianpen  uh ahi hi.

Mihing khat in haksatna tuak a, cih na’ng dang om nawn lo-a tua banga ki-uk cipna leh kinencipna langpana kinawk a kul nangawn ciangin mihing khat in a ngah hamphatnate pen ngeina bangin letsak, hutsak ding kisam hi.

Gam khat leh gam khat sanggam banga kizopna mainawtsak ding kisam hi.

UN pawlmite khempeuh in mihing ngah hamphatna bulpite akipan  mihing khat in a neih vaang leh manphatna, numei leh pasal in a kibang hamphatna ngah hi cih thu Thubulpi sungah kipsak pha kik uh a, a tangzaizaw suahtakna sungah a buppi-a khantoh nading, nuntak manphazaw tawh nuntak zawh na’ng hanciam hi.

Kumpi gamte in zong UNO  mah tawh sem khawmin suahtakna thubulpite  leh mihing hamphatnate zuih ding leh gam khempeuhah zahtak ciat ding thu mainawtsak ding kam ciam khinzo uh hi.

Hih kamciamna a tangtun kim zawh na’ng  kuamah peuh in suahtakna thute  leh hamphatnate  pha taka  a theih  kim  ciat ding uh  a kisam thupipen hong suak hi.  

Tua hi a,  mi kim in ahi zongin, minam sunga kipawlnate khempeuh in a hi zongin hih Tangkona pen lungsim sungah vom tawntungin,  hih hamphatnate leh suahtakna thute in a mainawt nadingin kihilhin ahi zongin, lai tawh kisinsakin a hi zongin, a mainawt zawh  na’ng lampi satin a hi zongin, gam khat sungah hi taleh, leitungbupah hita leh a hanciam dingin, a kipawl gam mite sungah a hi zongin, amau uk sunga gam mite sungah a hi zongin mannei tak leh leitungbup huapa a kizuih, a kisan nadingin     kumpi gam khempeuh leh mihing khempeuh in matutnapi khata  a san ciat dingun tuin UNO Gambup Khawmpi  in   Hih Mihing Hamphatnate Khuavannuai Tangkona    thu hong pulak hi.

 

Thu 1.

Leitung mihing khempeuh a suah tung limlimin a suaktasa-a piang hi a, hamphatna leh vaang a kibang ciat   ngah uh  hi.  Thu lungngaih theihna leh a sia a pha khen theihna thupha ngah uh a, sanggam khat hihna lungsim tawh khat leh khat a gamtat ciat ding uh ahi hi.

Thu 2.

Mi khempeuh in minam hang, meel pianzia  hang, numei-pasal hihna hang, kampau hang, biakna hang, gam sung ki-ukna hang leh ngaihsutna kibat lohna  hang, gammi hihna leh  suahna  khanna hang, neih leh lam hang, pianna leitang leh za dang khat peuhpeuh hanga kideidanna  om peuhmah loin hih Tangkona sunga kigen hamphatna leh suahtaknate khempeuh  ngah kim hi. Tua bek hi loin, mi khat peuhpeuh pen    a tenna  gam    a suakta gam hi ta leh, gam khat vaihawmna sungah a ki-uk lai hi ta leh, amau leh amau a ki-uk tuam nai lo  gam hi ta leh, kumpi gam sungah ki-ukna ciangtan nei khat sungah a om hi ta leh, tuate paulamin kideidanna om thei lo ding hi.

Thu 3.

Mi kim in ama nuntak theih nading, suahtak nading leh lungnopna ding hamphatna  ngah  hi.

Thu 4.

Kuamahmah  silain kinei thei lo ding a, kuamah  kisila bawl thei lo ding hi. Bang bang hi leh  sila vaia sumbawlna peuhpeuh   kikhaam hi.

Thu 5.

Kuamah kigawtbawl, mulkimhuai taka kibawlsiat,   mihing banga ki-en lo,  kineuseek hiam kigawt hiam phal  hi lo hi.

Thu 6.

Mi kim in upadi maiah mihing ngeina banga  mun khempeuhah ki-et ding hamphatna  ngah hi.

Thu 7.

Mi khempeuh upadi mai ah a kizakim ciat hi a, upadi tawh kituakin kideina om loin a kibanga ki-et ding thu ngah ciat hi. Hih Tangkona palsata kideina ahi zongin, kidei na’nga kihanthotna ahi zongin a om zenzen leh kuamah peuh in a kibanga hut theih na’ng   thu ngah ciat hi.

 

Thu 8.

Upadi in ahi zongin, thu bullet in ahi zongin a piak hamphatna bulpite palsatna peuhpeuh a kituahpih  thukhen zum in a phataka a hut nading mi kim in hamphatna  ngah hi.

Thu 9.

Kuamah upmawh thu tawh kimat  ahi zongin, thongah kikhiat ahi zongin, gamdangah kipuakkhiat ahi zongin ngeina  lo hi.

Thu 10.

Mi kim in ama ngah  hamphatna tawh kisai ahi zongin, mi khat’  tavuan tawh kisai    ahi zongin  pen guptuam paihtuam a nei het lo thukhenna zum khat in tangpi theih leh a kilawm a kituaka   thu a sit hamtang ding  a kicingin hamphatna  ngah  kim ciat hi.

Thu 11.

(1) Khialhna nei hi ci-a mi khat a kingawh peuhmah leh  tangpi theiha thu kisit a, amah leh amah a kihut nading ngeina banga a kihut khit cianga   upadi tawh kituakin a mawh mah hi a kicih matengin tua mi  pen a khial lo bangin ngaihsut ding a hi hi.

(2) Mi khat pen khial hi a kicih laitaka  leitungbup upadi ahi zongin, gambup khat upadi  ahi zongin tawh kituakin a sem lo  kha hiam, a sem khial kha hiam ci-a  mawhsak theih na’ng thu om a hih kei buang leh, a nung ciangin  mawh hi cih theih na’ng thu om lo hi. Mawhna a bawl laitaka gawt na’ng ngeina zah sanga gikzaw gawtna zong piak theih hi lo hi.

Thu 12.

Mi khat peuh mipum thusim ahi zong, innkuan thu a hi zong, innsung thu a hi zong, lai kikhak a hi zong tawh kisaiin kikausi phum mawk ding ngeina hi lo a, kiminsiatsak mawkmawk theih zong hi lo hi.

Thu 13.

(1)   Mi kim in ama gam sung mun khat peuhpeuhah lal kawikawi thei a, mun khat peuhpeuhah ten theih na’ng hamphatna  ngah hi.

(2)   Mi kim in a ut nak leh gam khat peuhpeuh, ama tenna gam nangawn nutsiat  theih na’ng, a ut nak leh a kileh kik theih nading hamphatna   ngah hi.

 

 

Thu 14.

(1) Mi kim in bawlsiatna tawh a kipelh theih nadingin  gam dang khat peuhpeuhah huhna nget ding ahi zongin,   buk theih nading ahi zongin hamphatna   ngah hi.

(2) Hih hamphatna  pen nainganzi  vai  tawh kisai lo-a khialhna  ahi zongin, UN’ ngimna leh thubulpite  tawh kisai lo-a khialhna a hi zongin a hih leh paulap thei lo ding hi.

Thu 15.

(1)   Mi kim in kumpi-gam  uk khat sungah gammi suah theihna hamphatna  ngah ciat hi.

(2)   Gam mi a suahna pen a mawkna tawh kiphiatkhiatsak ziau thei lo ding a, gammi khat pan gammi dang khatah a laih nop leh laih theihna thu zong kuamah in nial thei lo  hi.

Thu 16.

(1)   A khankhin numei pasalte pen minam ahi zong, gammi ahi zong, biakna ahi zong hangin zi leh pasal-a kineih ding  kikhaam thei lo a,   inntum  khat suanga kipat theih na’ng hamphatna    ngah uh hi.

(2)   Kitenna pen a kiteng dingte gel’ utna leh thukimna ngiat  bek tawh piang thei ding hi.

(3)   Innkuan pen minam khat hihna sungah leitung ngeina leh a kip  kipawlna khat suak a, Kumpi leh minam hihna in a hut ding thu ngah hi.

Thu 17.

(1)   Mi kim in neihsa khat peuhpeuh ama aipengin nei thei a, mi dang tawh zong kipawlin nei thei hi.

(2)   Kuama neihsa  thu kician lopi-in mawh  suhsak  theih  lo hi.

Thu 18.

 Mi kim in thu ngaihsut theihna, thu khentat theihna leh biakna tawh kisai suahtakna ngah hi. Hih suahtakna in biakna leh upna khek theihna suahtakna zong huam a, a biakna hiam, a upna hiam tawh kisai thuhilhna, zuihna, paaina leh tanna pulakna zong amah beka hih theihna, mi dangte tawh kipawlkhawma hih theihna leh tangpi maiah hih ding leh amah guakin sim  hih theih nading suahtakna  zong  huam hi.

Thu 19.

Mi kim in ama deih bang ngaihsut theihna leh ama deih banga pulak theih nading suahtakna ngah hi. Hih suahtakna in kuamah in nawngkaisak se lo-a   mi dang’ thu san theihna ahi zong, gamgi  ciangtan om se lo-in ahi zongin,  leh thu kizakna khat peuhpeuh zangin ahi zongin,  mi dang’  ngaihsutna leh thu khat peuhpeuh zon theihna thu   pia   a, amah in tua thute  hawmkhiat theihna  zong huam hi.

Thu 20.

(1)   Mi kim in nawngkaina bawl lo-a khawmpi vaihawm ahi zongin,  kipawl bawl theih na’ng ahi zongin  suahtakna hamphatna  ngah ciat hi.

(2)   Mi khat pen kipawlna khat peuhpeuhah  kihel hamtang dingin cih  teitei theih hi lo hi.

Thu 21.

(1) Mi kim in ama gam sung vaihawmnaah amahmah ahi zongin, suakta taka a teel mite   zangin ahi zongin  kikum theihna hamphatna  ngah hi. 

(2) Mi kim in amau gam sung kumpi nasepna sungah mi dangte mah banga sep  theihna hamphatna  ngah hi.

(3)   Mipite’ deihna  pen kumpi vaihawmna thuneihna in bulphuh tawntung  ding hi. Tua pen a man

taka a hun lianliana  leitung bupah kizakima kizang kiteelna ahi zongin, a sim thama me khiatna ahi zongin, tua mah tawh a kibang suakta taka me khiatna ngeina khat ahi zongin zanga kiteelna tawh ki-en ding hi.

Thu 22.

Leitung mihing khat hihna tawh mi kim in lungmuang taka  nuntak theih na’ng hamphatna  ngah hi. Tua pen mihing khat  a hihna tawh kisai suakta taka a khantoh nading leh zahtakna a ngah nadinga a lo thei lo ahi annek tuidawn ahi zong, mihing kipawlna tawh kisai  ahi zong, ngeina tawh kisai hamphatnate ama kumpi-gam neih leh lam ahi zong, kipawlna  ngeina tawh kituakin ahi zongin, gam khat in a hanciamna   leh gam tuamtuam kipawl khawma nasepna tawh ahi zongin a tangtunsak nading hamphatna  ngah hi.

Thu 23.

(1)   Mi kim in  nasepna a neih na’ng uh, amau sep nopna lam teel theih nading, nasepna tawh kisai thunuam leh thuman a hih na’ng, leh nasepna pan kimawk phiat ziauziau theih nading pana kihutna a hi zongin hamphatna  ngah uh hi.

(2)   Kuamah kideidan loin amau sepna tawh kituak ciata khasum zong a kibang a ngah na’ng uh mi kim in hamphatna  ngah hi.

(3)   Sepna a nei mi kim in amah leh a innkuanpihte tawh mihing ngeina banga a kilawm a kituak vang a neih nading, leh a kisapna banga  tangpi kihutna a omsa banga ngah behlap theih nading hamphatna  ngah hi.

(4)   Mi kim in amau hamphatna leh noptuamna hut nadingin sumbawl kipawlna phuat ahi zongin, tua ah pawlmi suah theih nading ahi zongin hamphatna  ngah hi.

Thu 24.

Mi kim in nasep hun sung nai ciangtanna tawh ahi zongin, a hun huna a khasum tawh   akhuan ngah theih nading dongin tawlngak hun leh tawldam hun ngah  na’ng hamphatna  ngah hi.

Thu 25.

(1)    Mi kim in amah leh a innkuanpihte’ cidam nading, nopsakna nading a kisam khempeuh, annek tuidawn, puansilh nikten, tenna giahna, zatui zaha kikepna leh lungnop  nading a kisam tuamtuam dongin ngah theih na’ng  hamphatna  ngah hi. Nasepna ngah lohna a om kha ahi zong, natna, hihmawhna, meigonna, tek leh guaina  akipan ama  thu a hi lo haksatna khat peuhpeuh a tuah ciang nangawna kikep  zawh nading hamphatna  ngah hi.

(2)    Nupi leh naupangte in a tuam mahmaha kikepna leh kihut  nading hamphatna   ngah hi. Nupa ngeina sung pana suak hi ta leh, nupa ngeina banga a kiteng lo sung pana suak hi ta leh, nau suak khempeuh in a kibanga kep leh khoi ding hamphatna  ngah ciat hi.  

Thu 26.

(1)   Mi kim in pilna zon theih na’ng hamphatna  ngah hi. Lai bulpi leh tan sawm ciang beek  peuhmah a sap om lo-a  kahsak ding ahi hi. Tan sawm ciang pen kuamah peuh pel lo-a a kah ding hi. Set lam pilna leh nasep siam nading pilna kuamah peuh in a ngah kim na’ng vaihawm ding hi. Tan sawm tung siah  zong amau pilna tawh kituakin mi kim in a ngah theih nading vaihawm ding hi.

(2)   Lai pilna kici pen mihing khat a cingtaaka a khantoh na’ng ahi zong,   suahtakna bulpi leh mihing hamphatna bulpite in a mainawt   na’ng ahi zongin hi ding hi. Leitung kumpi tuamtuam sungah biakna leh minam vai-ah  khat leh khat lungsim kimuhna, lungduaina  leh kilawmtatna in mai nawt a,  tham loin, kilemna a om zawh nadingin UNO’  sepna leh bawlnate mainawt na’ng hanciam ding hi.

(3)   Nu leh pate in tate pen  bang ci bang pilna guat  ding hiam cih thu tawh kisai  amau  khentat theih na’ng hamphatna   ngah masa  uh hi.

Thu 27.

(1)   Mi kim in gam sung nuntakna sungah bang ci bang ngeina leh tatdan zui ding, thu pilna hi leh science pilna hi leh tawh kisai bang ci zuih ding cih hamphatna  ngah hi.

(2)   Mi kim in lai tawh kisai, khutsiamna  tawh kisai, science pilna tawh kisai ama bawlkhiatna pana  noptuamna leh minphatna a ngah dingte pha taka hutsak ding hamphatna  ngah hi.

Thu 28.

Mi kim in gam sung leh leitungbup ah hih Tangkona sungah a kigen suahtakna leh hamphatna a kicing taka a ngah theih nading hamphatna  ngah hi.

Thu 29.

(1)   Mi kim in  mihing khat a  hihna pen suakta tak leh cingtaak taka a khantoh zawh na’ngin ama  omna gam sungah mawhpuakna nei hi.

(2)    Suahtakna leh hamphatnate a zat na’ng, a ngah na’ng tawh kisaiin, mi dangte in suahtakna leh hamphatna a ngahte uh zahtaksak a, a kilawma phawk kawm gige ding a hihna thu tawh ngeina omsa tawh kituakin, democracy ki-ukna sunga kizang tangpi khantoh  nading, kumpi ngeina banga kalsuan nading leh a sia a pha a kilawm ciang khat ciat a hih nadingin mi kim in a pha bek khat ciata gamtat ding ahi hi.

(3)   Bangbang hi leh hih suahtakna leh hamphatna thute pen UNO’ ngimna leh thubulpite  tawh ki-elpuaka zat ding hi lo hi.

Thu 30.

Hih Tangkona sungah thu khat peuhpeuh pen hih sunga kigen suahtaknate leh hamphatnate  suksiat nopna lungsim tawh Kumpi khat in ahi zong,  mi pawlkhat  in ahi zong,   mipum  khat peuhpeuh in ahi zongin na sem a, gamtat na’ngin bangmah  deihkaih tawm ding hilo hi.  

 

Zomi leh Politik

Zomi leh Politik

Agelh: Tual Khan Suan

Thu patna

Mihing khempeuh tawh a kipelh thei hetlo leitung ah thu nam nih om a, tua te in biakna

( Religion) leh gam leh nam vai( Politics) a hihi. Tua thute pen mihingte in a deih in a deih kei zong, a sem in a sem kei zong i nisim nuntakna tawh kikhen khia theilo a, mihing bang a ci leh sa tawh i nuntak sung teng tua thu namnih te in ei hong khihcip den hi. Pasian in mi masa pen a hi, Adam a piansak cil in a mah a thupiakte zui ding leh zahtak ding ( Biakna) leh Eden huan sungah vaihawmna a nei ding ( politics)  a hi nam nih tawh thupiakna na nei pah hi. Lam khat pan cileng, mihing te i piancil a kipan in tua thu namnih tawh a kipelh theilo ding a Pasian in a hong bawl i hihi.Mihing te pilna zui in kammal zatzia zong hong kikhel to zel a hong piangsak pa zahtakna pen Biakna ki ci in, leitung ci leh sa vai hawmna pen politik ( politics) cin hong kizang to hi.
Biakna pen kha thu leh sih khit ciang ding thu tawh kisai zaw a, politik pen leitung ci leh sa a i nuntak hunsung a i nisim vai dingte tawh kisai zaw hi.
 
Politik (or) Politics pen “Mihing nuntakna tawh kisai thu leh la khempeuh mipi tawh kipawl khawm a, (Pilna siamna nei mi, biakna na sem mi leh tangpi tangta khempeuh kihel in ) thu khensatna khat ngahna ding nasep paizia khat a hihi”. I nisim nuntakna khempeuh pen ei ma mimal tawh kisai ciat a hih manin ei zong thu khensatna ah i kihel ding a kisam ahi hi.Zomi te sungah Politik thu gen mite leh a sem mite pen mi hoihlo in kikoih bek hi lo in, Pasian a zahtak leh a thu um mite sep theih dingin kikoih lo hi. Tua a hih manin Politik sem mite pen zuau thu gen leh thuman a genlo ding in kituat a, nidang lai a i pu leh pa te’n dawi leh kau nei mite a muh bangun ki mu a kipam paih kha hi.
 
Zomi te bangin Kawlmi te zong hun khat lai in politik lauhna nei ngei uh a hih manin, politik pen tangpi tangta tawh kisai lo in sang kha uhhi. Tua bang hunlai takin Kawlgam suahtakna makai U Aung San in “ Pawlitik i cih pen tangpi tangta i nisim nuntakna ding a kisam a hi, bang ne ding, bang dawn ding, bang silh ding cihte tawh kisai thu hi a, mipi khempeuh tawh kisai thu hi” a cih ciangin mi tampi in politik i deihna man mu thei uh hi.Tua banga politik lauhna pen a hong mawk pian thu hilo a, a beisa in politik sem mi pawlkhat in minam, gam itna leh mipi te nisim nuntakna khantohna ding sepna ding pan lampial in mimal angsung khualna, nekgukna leh thumanlo nasepna tampi sepna hang hi zaw hi. Tua bangin politik nasem mite i lam pialna hangin i Zomite in zong politik lauhna nei in i minam leh gam puahna nasem lo in i om kha hi.
 
Hih munah thu kalzeh in ka gen nop thu in, Zomi te pen Pasian biakna (Christianity) i gam hong tun ciangin i gam ah khantohna kipan hi i ci hi. Pasian biakna (Christianity) a gensia ka hih loh banah hih thu tawh kisai in a kinial theilo thu a hih hangin, a vekpi in (100%) man khin dingin ka um kei hi. A hangin Zogam ah Pasian biakna (Christianity) pen i Zogam a hi Tedim khua pen 1909 kum in hong tunga, a hi zongin leitung galpi nihna ( II WW) ciang dong pen leitung vaitawh kisai ah khantohna tampi ki mu theinai lo hi. Leitung galpi khatna hunsung in Zomi pawlkhat Piancit paina hang leh leitung galpi nihna in i gam hong nawk khakna hangin mangkang te’n India leh Burma gam kikawm tuahna dingin mawtaw lam hong toh uh ciang i gam ah sik, set van tuamtuam, zatui zaha zatdan te hong kipan a hihi.
 
I Zogam ah zatui zaha tawh kisai tua ma in ki tamzat nailo a hihna tawh kisai in Dr.Sian Za Kham in “1945 kum a kipan in i gamah i zak masak zatang in May & Baker, England a kibawl sulphonamides zate hi a, a min kithei lo a hih manin MB kici a, Lushai sumbawl te in hong zuak masa uhi. Natna khempeuh a hoih ding hong ci uh a hihmanin cisa nat, lutang nat, gilna laina a kipan ankam limlo nangawn in MB kibak lel hi” ci’n Zomi Christian Kum za Mual Suang ( Tedim)- 2004 kum a kibawl laibu sungah na gelh hi. Tua bangin leitung galpi nihna in i gam hong nawk khak ciangin i thu muhna tampi hong kihong a, leitung ci leh sa nuntakna khantohna ding ngaihsutna tampi hong piang khia tuam hi.

Politik tawh kisai i gen ciangin kumpi vaihawmna ( government) bek i mu pah hangin mihing te nisim nuntakna tawh kisai ( social relations) a hi biakna, an nek tui dawn zonna, inn leh lo neihna te a kipan in thu neihna ( power) leh sep theihna ( authority) te ah zong kimu thei hi.A diakin ei Zomi te sungah politik cileng, kumpi te bek tawh kisai sa i hih manin, kumpi ( government) leh thuneihna (power),sep theihna ( authority) te tawh kisai tawm i gen ding hi.

 
Kumpi vaihawmna (Government) pen “dan (rules) leh thukham ( laws) te a nungta sak ding sep theihna ( authority) a neipumpi khat a hihi”. Mihing te nuntak zia kikhelna zui in mihon kipawl khawmna (civil society) zong kilam dang toto hi. Gam sung mipi te nuntakna a nop zawkna ding, leh a khantohna ding vaihawm dingin mipi deihna tawh palai sawl in gam kivaihawm ahi hi. Kumpi vaihawm pumpi (body) khat a om theihna dingin mipi te in thuneihna i piak kul hi. Tua ahih manin mipi te’n thu neihna a piak loh, vaihawmna nei mite pen kumpi maan hilo a mipi te gal a hihi. A taktak in kumpi te nasep ding pen, gam sung mipi te vengbit ding, nuntak nek zonna khangto sak ding leh mipi kisapna te huh ding cihte hi zaw hi.
 
 
Thu neihna (power) i cih ciangin “hoih tak leh ki cing tak a sep zawh lohna ding munte nangawn ah a hoih penpen a sep zawhna, tha hatna” ci’n mipil pawl khat in na gen hi. UDHR article 21(C ) na sungah thu neihna tawh kisai in  “kumpi te thu neihna (power) pen gam sung mipi te kiang pan kipan hi hen” ci’n na kigelh hi. Gam khat sunga gam sung thu leh la khempeuh pen mipi te tawh zong direct a hih kei leh indirect a kisai vive hi a, thu neihna taktak pen mipi te khut sungah a om hi zaw hi. Gam uk mite pen, mipi te deihna tawh kituak a, gam-uk ding palai a kisawl bek hi zaw a hih manin mipi te’n a deihloh kumpi te pen hawlkhia theihna nei uhhi.Sen gam a Communist te thu neihna ngahna ding ma kai Mao Tse Dung in “ thu neihna pen thau long mong pan kipan hi” ci’n kam pau a, a gam sung mipi te deihna a hilo, thau tang deihna tawh gam vai hawm a hih manin, 1987 kum in Pekeng khuapi lai zang ahi, Tiannamen Square ah a gam mipi tampi tak in kumpi te langpan na na nei in, mipi sihna leh kahna tung ngei hi.
Authority pen  mi khat (or) kumpi department khat peuh in a thuman in na hoih khat sep theihna ding leh sepna ding thupiak theihna ding” cihna hi a, tua bang in na sep theihna ngah zia pen a tuamtuam om hi.Mipil Max Weber in a genna ah mihing te in sep theihna nei in mipi te in a thu a zuihna a hang pen hih a nuai a nam thum bangin na gen hi. Ngeina ( A kiluah sawn) thu neihna ( Traditional authority) pen a beisa hun lai in makai te in i ngeina tawh kisai pu leh pa paidan leh vaihawm zia tuamtuam tungah thuman tak in zui uh a hih manin mipi te in a mau zahtakna a,a thu kimang suak a hihi.
 
Tua banah sep theihna ( authority) nei mite pen a beisa makai te innsung pan a suak khia a hih manin tua a kiluah suaksuak a hihi. Mipi te in “a beisa in hih bangin na kisem zel hi” cih lungsim nei a hih manin makai te tungah septheihna a piapia a suak hi. Hih pen nidang lai hun a kumpi nam, nam lian cih bang tawh vaihawmna pan kiluah suk hi a, sep theihna sangpen makaite tung bek a hihi.Vangliatna hang sep theihna ( Charismatic authority) pen mimal khat i thatang hatna leh pawl huai siamna pan a hong khang khia a hihi. Galkap siam khat in a ma gal siamna hangin makai panmun ngah a, tua pan nasep theihna khang khia semsem a hih manin a tawpna ah a thu nei pen hong suak hi.A hizongin hih sep theihna pen khansau lo hi. Gentenna in nidang lai hun in Roman te sung pan Augustus a kici galkap mangpa zong hih vangliatna hang sep theihna tawh gam sungah thunei pen hihna a nei a hihi. Panmun zui a sep theihna (Legal-rational authorities) pen mimal khat in a ma panmun (or) zaa pan a ngah sep theihna a hihi.Tu hun teh mite in hih panmun zui a sep theihna hoihsa in zui leh zang zaw hi. Bang hang hiam cih leh, hih sep theihna in mipi a ding in a hoih zawk mah bangin a sem khia mimal te a ding mahmah in zong hoih zaw hi.Gentehna in tu hun a khangthak democracy (modern democracy) pai zia pen hih panmun zui a sep theihna hoih khat a hihi.
 
Thu khupna

Politik hoihna gamah sa leh gal kidona te omlo in, kilemna om a hih manin gam mipi te’n zong na hoih takin sem thei a gam khangto hi. Politik hoih lohna gam te ah sa leh gal tam a mipi te nuntakna zonna ding hamsa hi.A diak in Kawlgam ah politik hoih lohna hangin mihau sa pen te a kipan mizawng pen te ciang dong nuntakna ah lungmuanna om lohi.Gal leh sa tam hang leh nuntakna hamsatna hangin inn leh lo nusia in mi gam mi lei ah nasem in mi tampi i om hi. Politik hoih leh mipi te’n nuamsa in politik sia leh mipite’n hamsa sa hih manin politik hang apiang thute pen mi khempeuh in thuak hi. Kawl gam sung politik hoih lohna hangin kawl gam sunga teng Zomi te’n minam leh gam khantohna ding suakta takin na kisem theilo hi. Pawl tuamtuam phuh in minam khantohna ding nasep kiphallo a hih manin biakna pawlpi huamsung ciang bek tawh minam a ding na kisem thei bek a hihi. Tua hia, biakna makai te tavuan pen lian mahmah a, biakna vai bek hilo in leitung ci leh sa vai ah minam khantohna ding makaih siam kisam hi. Kha thu ah khanlawhna i piak bangin leitung ci leh sa vai ah zong khantohna i piak ding kisam hi. Lei tung ci leh sa vai hawmna leh politik pen kumpi te bek tawh kisai ci’n ngaihsun lo in leh, tangpi tangta te’n zong minam leh gam khantohna ding ei tawh kisai leh i sep kul a hihna theih ding thupi mahmah hi.I sih khit ciang a ding kha thu tawh kisai i pelh theih loh thu a hih bangin leitung ci leh sa a i om sung pen leitung vai, nek leh tak zonna tawh kipelh thei ngei lo ding i hihi.

Pasian maw Sesum (More Money Than GOD

Pasian maw Sesum (More Money Than GOD)

By Tual Khan Suan

 

Newspaper lui ka lemlem leh nimit 19 February,2007 ni a USA Today newspaper sungah USA gamsung Virginia gamke St. Jude Catholic biakinn a sem Roman Catholic ( RC) Diecese Rodis in biak inn neihsa sum US $ 600,000 ( tul za guk) a nek gukna hangin thu khenzum ah thu sitna a thuakna ka sim kha hi. Hih bang thu kasim lai in ka lungsim ngaihsutna ah mihing tampi te’n Pasian sangin sum thupi sak zawkna leh midang te’n hong mu kei, hong thei kei tah ci’n Pasian deih loh na hoihlo tampi a kisep ngamna hong phawk sak kik hi. Pasian ih mut kal cih bang a om sam loh hangin Pasian om lam i phawk khak loh hun tam pha mahmah hi.

 

Newspaper a dang khat sung ka et kik leh Cartoon kigelhna column ah a hong tung ding 2008 kum, USA gamsung ah Presidential election a kidem ding ( candidate) a kithoi Democratic party a nominees te lak pan a hat pen Senator Hillary Cliton a kikona ka sim kha leuleu hi. Halary Cliton in a ma mee (vote) zonna ah a thupi sak pen hauhsakna a hih manin USA gamsung a Pasian um mi tampi in Pasian a mang ngilh khak ding lauhna tawh Hillary Cliton in “ Pasian sangin sum deih zaw hi ( More money than God)” ci’n a kona uh a hihi. Hih Cartoon ka muh ciangin kammal li (4) bek tawh kigelh hi na pi  USA gam sung mite ngaihsutna hong kilang sak mahmah zo a, mitampi tak zong sum deihna hang in Pasian kiang pan lam pial khin zo a hih na hong kilang sak hanhan hi.

 

Hih a tunga thute ka muh ciangin tu lai tak Zomi te nuntakna zia zong ka mit kha sungah hong kilang siasua hi. Zomi te zong an nek tui dawn ding kisap manin nasep tuamtuam kisem samna pi haksatna tampi tawh leitung minam dangte nuntakna zia kipha zo nai lo hi.A beisa kum sawtnai lo hun ( 4-5 decade ago) lai in Zogam ah galkap piang ki ci a, tu hun tak teh Pasian nasem leh biakna na sem piang kici leuleu hi. Zong man takpi hi. Zomi te in nekzonna dingin a beisa hunsung a mi a tam zaw sep theih galkap na kisem ngeingai a, tu hun tak teh galkap na sep tawh innkuan nuntak kicing zo nawnlo a hih manin nuntakna zonna ding a om sun lampi a hi Pasian na leh biakna na kisem ngeingai leuleu hi. Pasian na sem ding a ki aap takpi leh sapna ngah takpi a kisap bangin, mi pawl khat zong om tak pi mah a, a hih hangin biakna na sem ding in sapna leh ki aap luat zong kullo in kisem thei hi. Mi pawlkhat te in biakna na sep leh Pasian na sep ki khenlo kha a hih manin biakna na sem pawlkhat te Pasian na sem kisa a pawl pi sung, khua sung leh gamsung ah buaina tampi om den hi. Biakna nasem te in a pualam ah a ut bangun gamta in nipi ( Sunday) ni ciangin pulpit tungah kah in thu hilh zong zum huai sa lo uh hi. Thu hilhtu te man lo a hih manin a tawpna thu ngai mi te zong lampial gawp in siatna piang thei zaw hi.

 

Zomi te pen a tamzaw Christian ki hi a, Pasian upna a thupi sak minam te i hihi. Sep ding bawl ding om leh Pasian min tawh nasem leng a nuam mahmah a hih manin na khempeuh Pasian min paulam in na kisem hi. Tua hi a, i tualsung nuntakzia ( civil society) zong i biakna in hong zeel a, i Christian biakna bulphuh na khempeuh kivai hawm a hihi. Biakna makai Upa, Siate pen kizah tak a, a thugen te uh hoihin hoih ta kei leh Pasian zahtak manin nial ding in kituat lo hi. Tua a hih manin i minam hoihna ding leh siatna ding pen biakna makai ( Upate leh siate) makaihna sungah om hi. Hoihna ding a hong makaih uh leh i minam bup in a zal ki zo dinga, hong pai khialh pih uh leh i minam bup in daan kituak ding hi.

 

Tua bang in Pasian zahtakna tawh a thu mang Zomi te sungah na sem ding mi hong kibeh lap in nasep zong nuam mahmah hi. A hizong in Laisingtho tawh a Pasian thugen mi khempeuh pen Pasian nasem taktak ding a ki aap leh sapna ngah hi lo uh a hi manin a piang thak takpi hi lo in, a kipiang thak sak mite hi a Pasian na sep ding sangin Biakna nasep ding hong kin zaw uh hi. A maute in mun khempeuh ah Pasian om cih um na pi Pasian sangin mite lau zaw uh a, mite muh loh leh theih loh na mun te ah a hoihlo nate sem ngam mawhlo uh hi. Pawlpi sum zong ne gu ngam lah lo uh hi. Khilhna tuamtuam zong bawl ngam lah lo uh hi. Tua bang mite in Pasian a lungkim sak ding sang sik in Pasian min dai sak zaw uh a hih manin i minam tungah Pasiah hehna hai hong kibua thei lai hi. Pasian a min dai sak khat leh nih hang tawh i minam bup tungah Pasian hehna i thuak kha thei hi.

 

USA gam zong a kiphuh khiat cil lai hun in Pasian upna leh muanna tawh kiphuh khia gam a hih manin“ In God we Trust” ci’n a sum laidal tungah ki gelh ngiat gam a hihi. Pasian upna leh muanna tawh a kal suan hun sung uh leh Pasian um taktak te in a makaih manin USA gam pen leitungah gam hoih leh a hau pen gam suak hi. A hizong in Pasian sangin sum a thupi sak luat uh ciangin a gam uh a hauhna zah in lungnopna om lo hi. Leitung bup ah kithahna leh khialhna (criminals) a tam pen na gam cileng kikhiallo ding hi. Abeisa April 16,2007 ni a Virginia Technology sang ah South Korea gam pan a suak mi khat in sang inn sungah mi (23) kap lum a, USA tangthu sungah mi khat i khut lum tawh mi a tam sihna pen khat a hihi. A gammi te leh gam sung makai te ( biakna makai leh politik makai te khempeuh) pen thu man gamtat nawnlo in Pasian sangin mihing te mai en zaw in Pasian kiang pan lam pial lua mahmah ta uh a hih manin Pasian hehna a gammi te khempeuh in thuak uh hi.Makai te khialhna a hi zongin mi khat i khialhna a hi zongin a ma bek in thuak lo in, mipi leh minam bup in ki thuak thei hi.

April 19,2007

 

Hiam gamtatna ( Terrorism)

Hiam gamtatna ( Terrorism)

By Tual Khan Suan

 

“Muh dahna pen muh dahna mah tawh thu hoih suak theilo in, itna tawh thu hoih suak thei bek hi.” Buddha.

September 11,2001 ni a USA gam New York khuapi a om World Trade Center building, Muslim biakna bia Osma Bin Laden makaih Al-Qaeda pawlpi pan hiam gamtat mi ( terrorists) te in Vanleng ( airplane) kawikaih ( hijacked) in a suksiat uh ciangin tuhun leitungah “ terrorism” cih kammal hong laang mahmah hi. USA kumpi a sem G. W. Bush khawnbawl upa pawl ( administration) in zong “ hiam gamtatna gal ( war on terrorism)” cih kammal zangin leitung ah tangko uh a, Al-Qaeda pawlpi mite om na mun khempeuh gulhik cil geh in zon cihtak zong pah uh hi. Tua banga hiam gamtatna ( terrorism) pen tuhun a kipan hi lo hi. Leitung tangthu tawm en kik leng; 1931 February 21 kum a Peru gam Arequipa khuapi a Byron Rickards in meithal ( arms) tawh a deih ngetna, September12, 1948 kum a Greek te i T.A.E Vanleng (AirlinesOpen in a new window plane) communist panpih mi ( 6) in Yugoslavia gam a khualzin ding sangnau pang te a kawikaih ( hijacked) na, 1960’s kum pawl a Israel gam thong sunga a om Palestinian mite a khak khiat ding deihna tawh Israel gammi Olympic a kimawl dingte Palestinian gammi te in a kawikaihna te uh gen kei leng zong leitungah a ciamteh tak vanleng kawikaihna pen tam mah mah khin zo hi. A hizongin tua bang thu piangte hih mun ah i gelh kik kei ding hi.

Hih bangin hiam gamtatna ( terrorism) cih kammal a ki lim zat mahmah hun lai tak in hih kammal i khiatna ( defination) pen gelh khiat ding zia tawh kisai zong buaina tampi om hi. Cihnopna ah a bang ci bang gamtatna te hiam gamtatna ( terrorism) ci ding? Kumpi a sem te zong hiam gamtatna ( terrorism) a sem ngei ding uh hiam? cih bangte leitung bup san theih ding thukimna hamsa mahmah hi. Bang hang hiam cih leh na khempeuh ah a lang tuak om den a, a lang khat lam leh a mau dinmun pan en leng a san theih huai thu leh a mau leh a mau khial a kisa lo vive i hihi. Mikhat ( ahih kei leh) pawlkhat in a mau muhna leh ngimna a ngahna dingun a gamtatna pen hiam gamtatna ( terrorism) ci’n a dang mite ( a langpang mite) te’n a ko lai tak un, a mau leh a mau pen “ suahtakna ding na semmi ( freedom fighters)” ci’n kimu uh hi. ( One man’s terrorist is another man’s freedom fighter)

Tua hi a, hiam gamtatna tawh kisai san dan a tuamtuam tampi leh leitung bup santheih ding a khiatna pen ngah hamsa hi. United Nations Organization (UNO) a kiphuh khiat ma hun a leitung bup minam te kipawlna a hi League of Nations Convention (1937): in “gam khat langdona ding a hih kei leh mimal khat or mihing pawlpi khat or tangpi tangta te lungsim sungah lungzinna, lauhna, ciziat huai gamtatna a piangsak thei tual thahna leh khialhna pen hiam gamtatna (terrorism) c’in ciamteh hi”. Tua khit leitung bup minam kipawlna ( UNO) in, UN Resolution language (1999): “ 1. tual thahna leh khialhna, a thu manlo a hiam gamtatna te khempeuh pen mi kua cih omlo muh khempeuh ah a bawl leh nakpi takin mawh sak hi, cih leh 2. “ politik tawh kisai a hizongin, ngaihsutna ( philosophical) , lunggelna ( ideological) , minam, biakna leh a dangdang paulap in a tupna leh ngimna ngahna ding in mimal, mihon leh tangpi tangta siatsakna leh a ci ziat huai gimna a piangsak thei ding gamtatna pen hiam gamtakna (terrorism)hi ci’n let khia hi”. Hih a tunga te pen leitung bup minam kipawlna ah hiam gamtatna (terrorism) tawh kisai a khiatna tei khiat ding a thusun (proposal) thu te a hihi.

Mi khempeuh in tupna leh ngimna kinei tek a tua i tupna leh ngimna i ngahna ding hong langpan te leh hong khak tante “galte” ci’n kiciam teh a hih manin mi khempeuh gal nei i hihi. Kumpi dinmun a om te in tua bang hong langpan te pen “ thukham pualam a om mite ( outlaw), tual that leh khialhna bawl mite ( criminals)” cih bangin tangko thei uh hi. A hizongin kumpi a sem te mahmah in zong a mau ( kumpi te) tupna leh ngimna a tangtun na ding un tua bang na sep te sem ngei kha ding uh hi. Gentehna in a galte uh a mat zawhna dingun bang mah khialhna nei lo mipi (civilian) te gawtna, mihing banglo a bawlna ( inhumane) leh thauvui thau tang tawh kapna te a hihi.

Hiam gamtatna tawh kisai a khiatna leitung bup san theih ding a kilet khiat na ah hamsatna a om hangin hiam gamtatna a pianna dingin “hiam gamtatna i gah leh a pianna ding a sem mite” a om ding a kisam hi. Tua hi leh, terrorism i cih teh “gamtatna i gah (the expected result of the violence)” bulphuh khensatna nei ding maw, a hih kei leh  “ a pianna ding a na sem mite ( the nature of the actor)” bulphun a khensat zaw ding maw cih thu ngaihsut huai khat hong suak kik hi. A zenzen in “ gamtatna i gah ( the result of the violence)” bulphuh leng Mizo gal lai hun a India galkap te in Mizo tangpi tangta te tunga a gamtatna te uh a hi, mihing banglo a gawtna, inn leh lo leh neihsa lamsa suksiat sakna, numei sualna te a kipan, Kawlgam galkap kumpi te i gamtatna te kihel in, USA gam kumpi in Afghanistan leh Iraq gamsung ah khialna nei lo mipi te bomb leh thauvui thautang tawh a thahna te khempeuh zong hiam gamtatna ki ci thei hi. “ Apianna ding a sem mite ( the nature of the actor) bulphuh leng a thunei kumpi leh a tha hat pen kumpi te gamtatna leh nasepna khempeuh pen thu man hong suak ding a, leitung ah thukham vaihawmna ( the rule of law) bei in, mihing vaihawmna ( the rule of Man) tawh thu kigen ding a hih man in thu manna ( justice) om nawnlo ding hi.

USA gam kumpi in leitung bup ah hiam gamtatna a bei siangna dingin deihna tawh hiam gamtat pawlpi ( terrorist organization) te a hi Al-Qaeda, Hazzebollah leh pawl dangdangte a om na peuh uh delh in a do den uh hangin a mau ( Al-Qaeda) te in USA gam kumpi pen zong hiam gamtat mi ( terrorist) in mu uh hi. A mau hih bangin na ci uh hi. “Killing a person in a forest is an unforgivable sin, But the massacre of a peaceful nation is a debatable question. Hiam gamtatna ( terrorism) pen lungsim tawh kisai ( mentality) a hih manin mihing te kisin sak na pan a zung kha a hihi. I Zomi paunak sunga “ Ak gilo khat go (that) leng a taang ( khek) ding khat om veve” a cih uh bangin hiam gamtat mi khat a sih hangin tua bang ngaihsutna a bei siang ding hilo a, mi dang khat a khek ding om veve ding hi. Hiam gamtatna pen hiam gamtat mite in bei sak ngeilo ding hi. ( Terrorism can not be eliminated by Terrorist)

Mihing te nuntakna ah thu hoih khat ngahna ding in a hoih lo gamtatna tawh ngah sawmna pen lam khialhna khat a hihi. Thuhoih vaihawm ut mite in a hoih lo nate leh a hoih lo na a sem mite tungah thu hoih leh thu dam tawh gamtatna bek in mihing te nuntakna ah lungmuanna om sak thei bek hi. “ Kawl zong thu dam in ki ho” ci’n i paunak sungah i zat bangin thu dam tawh kihona hang bek tawh i deih thu hoih ki bawl khia zo pan hi.

MINAM ABEIMANG LOHNA DI IN ZOMINAM NI KEMCING NI

I minam a beimang lohna ding in Zomi Nam ni kem cing ni

A gelh: Tual Khan Suan ( Suanpi)

 

Minam khat i hihna (national identity) i lah khiat na ding a kisam a hi; minam dangte tawh kibang lo kampau , lai, ngeina, zia leh tong, ki-ukna ngeina tuam neih ding te kicing takin i neih hangin i tenna gam, mun leh mual kician i neih kei leh minam gam (nation state) khat in ciaptehna ngah ding hamsa hi. Zomi te pen a tunga i gen minam khat hihna (national identity) dinga kisam teng a kicing in nei i hih manin Kawlgam , India leh gam dang mun tuamtuam ah minam khat in hong kiciam teh hi. Minam khat i hih mah bangin a beisa hun lai pek panin i pu leh pate pen a mau leh a mau ki-uk minam a hih bek hilo in, minam dangte tung ah to’ kai ngeilo uh hi. Mangkang gamkek te i gam  hong lut uh tak ciangin zong a suakta minam leh gam i hihna bul phuh in gam ukzia ding hong gelh uh a, minam dang te tawh kibang lo in a tuam vilvel in hong uk uhhi. Nitum ngeilo gam a kici ngei mangkang gamkek te in hih bangin Zomi te a suakta minam i hihna leh gam leh lei nei minam khat in hong ciaptehna uh pen1896 kum a Zogam vaihawm zia ding Upadi (The Chin Hills Regulation, 1896) in kipsak mahmah hi.

 

Kawlgam in mangkang gamkek kumpi te ukna nuai panin suahtakna a lak ding ciangin zong Kawl mi te in minam khat a kiciamteh Zomi te vai ding a mau deihna bek tawh vaihawm theilo uhhi. Kawlgam suahtakna kisai thu kikupna a nei makai U Aung San  leh mangkang Prime Minister Attlee te thu kikupna sungah Zogam leh Zomi te vai ding pen Zomi te tawh kikum masa lo in minam dangte in gensak theilo a hihna Attlee in na bul let mahmah hi. Zomi te vai ding pen Zomi te phalna omlo pi’n kivaihawm theilo a hih manin Zomi te tawh thukimna lak masak ding kawlmi makai te hong hanciam kik uhhi. Hih thu pen kawl mi te in Zomi pen leitung ah minam khat in a ciamteh ut loh uh hangin leitung minam dangte in Zomi te pen leitung ah minam khat in hong ciaptehna uh kilang sak mahmah hi.

 

A suakta gam leh minam khat a leitung in a hong ciapteh a hi, Zomi te pen i veng a om Kawlmi te in minam khat in hong ciapteh ut loh bek uh hi lo in, minam hihna beina dingin a tawntung in hanciam den uhhi. A tunga i gensa mah bangin Zomi te vai ding pen minam dangte in a mau deihna bek tawh vaihawm sak theih a hih loh manin 1947 kum February 12 ni in, Shan gamke Pinlong khua ah “ Kawl mi te sa tanh leh Zomi te sa tanh kikim ding” cih thugui bulphuh in thukimna lai i makai masa te in letmat na thuh uhhi. Ahi zongin tua thukimna laipi pen laidal tung bek ah om a, kawl gam in suahtakna a ngah taktak ciangin Zomi te pen hong kinuai siah in “ I sa tanh kikim lo” hi. Zomi in tanglai pek pan i pu leh pate tenna gam teng a hi, “Kalay-Kabaw zanggam teng leh Khamhti-Homalin gam ciangciang pen ko gam a hih manin Zogam in hong ciamteh sak un” ci’n Kawlgam thukhunpi gelhna ding a kisam mahmah thu zonna a hi, 1947 kum April-May kha sunga kibawl Maymyo Inquiry ah a nget uh hangin tua thu pen hong kizep mang sak hi. Kawl makai te in mangkang kumpi te hunlai a kizang gamkhen zui nawnlo in a mau deihna bek tawh hong bawl kik uh a, mualtung gam teng pen Zomi te a tuam vilvel a tenna gam khen ( Chin Hill Special division) ci’n min khat tawh i pu leh pa tenna gam teng hong khen sak uh a, kam khum tawh hong khem uhhi. Hih pen Kawl mi te in Zomi te minam khat i hihna a beina ding hanciamna masa pen a hihi.

Kawl gam ah gam uk kumpi te’n min tuamtuam zangin a kikhel zel hangin Zomi te tawh kisai a muhna uh pen kikhel ngei tuanlo hi. Zomi te pen leitung ah minam khat i hihna pan a bei mangna ding a hanciamna uh zong a beisa hun pan kipan tuhun dong mah kizom to den lai hi. A diak in:

 

(a)   Zomi te pen kawl mi suah sak sawm uh.

 

Minam khat hihna dingin lai (literature) neihna pen kisam mahmah khat ahi hi. Zomi te in Zolai leh Zo ngeina sin theihna pen mihing khempeuh ngah theih pianpih hamphatna (fundamental rights) a hihi. Minam khat peuh in a ma minam lai leh ngeina a theih nawnloh ciangin minam mangthang hi a, gam sunga om minam te a mangthang lohna ding in a mau lai leh ngeina sin theihna ding lampi a honsak ding pen gam uk kumpi te i tavuan a hihi. Amau leh a mau a hih zawh kei uh leh zong kumpi te in huhna a piak ding uh a hihi. Tua bangin gam uk kumpi te in a gam mite a kepcing ciang bek in tua gam dingkip zo pan bek hi. Tulai takin Zolai leh Zo ngeina sin theihna ding gam uk kumpi te in hong huh lo uh hi. Zomi te in a mau minam itna tawh a hanciamna uh a hi Zolai leh Zo ngeina sin theihna ding lampi a bawl uh ciangin zong kumpi te hong khak sak lai hi. I Zogam ah Zolai leh Zo ngeina sin theihna pen kumpi te in hong phallo uh hi. Tua bangin Zomi te in Zolai leh Zo ngeina sin theih ding a phallo bek uh hilo in, a lang khat pan in Zomi te’n kawllai leh Kawl ngeina pen sang ah  hong sin sak uhhi. Kawllai pen tan lang (beginner) pan in ut leh ut loh thu hi lo in, hong sim sak uh a, sang laibu khempeuh zong kawl lai vive tawh hong sinsak lai uhhi.

 

Tua bangin Zomi te in Zolai leh Zo ngeina theilo in Kawl mi suak khin ding cih ngimna tawh Zomi naupang no te tungah kawl kumpi te hong hanciam bek uh hi lo in a khang cing khinsa Zomi te tungah zong lampi tuamtuam tawh hanciamna hong nei lai uhhi. Mangkang kumpi te hun lai pek pan ki pan Zomi te’n galkap sungah minam dangte tawh om khawmlo in Chin Rifle Regiment tawh Zomi galkap tampi in gam hutna dingin na sem uh hi. Kawl kumpi hong khan ciangin tua a om sa Chin Rifle Regiment ah Zomi te omsak nawn lo in minam dang te guang uh a, a mau deih bangin nasem in minam dangte tawh hong kimai mial sak uh hi. Tua bek hilo in Zogam ah kawl galkap tampi hong puak uh a, Zomi te tawh sisan kigawm theihna ding in Zomi numei te hong suksiat sak uhhi. Hih bangin Zomi te pen leitung ah minam khat i hihna a beina dingin lampi tuamtuam tawh kawl kumpi hong hanciam uhhi.

 

(b)   Zomi te pen Kawl mite biakna biak ding hanciam uh:

 

Zomi te in a beisa hunlai in pusa pasa biakna (traditional beliefs) bia uh a, tua pan in Chirstian biakna Zogam hong tun teh pusa pasa biakna sangin Christian biakna a hoih zawk lam a theih uh ciangin Zomi te Chirstian biakna ah kikhel uhhi. Tulai takin cileng Zogam ah Chirstian biakna a bia pen mimal 75% sang in tawm zaw lo hi. Minam khempeuh in a mau upna pen suakta takin bia thei ding cih thu pen gambup thukhunpi sungah a om tei hangin laidal tung bek ah om a, a taktak in Zomi te in a mau biakna tawh kisai nasep silbawl ding khempeuh ah kumpi ( kawlte) phalna lo tawh kisem theilo hi. Tua bangin Zomi te in Christian biakna tawh kisai suakta takin upna thu tangkona leh biak piakna a neih theih loh lai tak in, kawl kumpi te in a mau biakna pen Zogam ah hong puak to uh a, suakta tak in nasem thei uhhi. Zomi te biak inn lam ding hong ki phal loh lai tak in Kawlmi te biakna inn (tat tung) lam na ding kumpi te’n panpih in Zomi te tang tha (volunteer) sam lai uh hi. Kawl biakna a bia utlo Zomi te sungah nasep hamsa mahmah ta seleh, lampi tuamtuam zang in han ciam uh a, Kawl biakna a bia dingin Zomi te pen an leh tui, sum leh pai tawh zol uhhi.

 

Tua banah sang lai simna leh biakna pen khentuamlo in Zomi naupang te a neu tung a kipan kawl biakna sungah a lut theihna ding un, sang laisin bu sungah kawl biakna tawh kisai thute hong sinsak lai uhhi. Hih pen kawl kumpi te in Zomi naupang no te kawl biakna sungah a kaih lut theihna ding hanciamna thupi mahmah khat ahihi. Tua bek hilo in, mun tuamtuam pan Zomi naupangno te kai khawm in kawlgam ah sang kah sak ding in khem uh a, Phonggyi sang ah kawl biakna sin sak uhhi. Hih bangin kawl kumpi te in biakna tawh kisai in Zomi te biakna bei mang na ding leh Zomi te minam hihna bei mangna dingin lampi tampi zangin hanciam to den uhhi.

 

( c) Minam ni bawl ding phal lo uh:

 

Minam khempeuh in a mau minam tawh kisai ciaptehna te kepcing theihna, pawi bawl theihna pen namdang khatpeuh in a khak tantheih lo hamphatna (inalienable rights) ahi hi. Kawlgam sungah zong Kawl mi te in a mau minam ni dingin December tungkha liik zawh ni (10) ni ta in bawl uh a, gam bupsung ah zong kumpi zum khempeuh kikhak hi. Hih pen a mau ( Kawlte) a dingin ni manpha mahmah ni ahihi. Kawlgam pen minam tampi tenna gam ( multi-nations state) a hih mah bangin kawlte bek hilo , minam tuamtuam tampi tawh kilam khia gam khat a hihi. Tua hi a, Kawlte in a mau minam ni thupi a sak zah khat un, minam dangte in zong a mau minam ni leh ngeina tawh kisai ni thupi te thupi a sak ding uh pen a lamdang hilo hi. Ahizongin gam uk kumpi te thumeilet (policy) hoih loh manin Kawlmi a hilo , minam dangte pen a Kawlmi suah sak ding leh a bei mangna ding hanciamna tawh minam dang te ngeina leh minam ni te Kawlgam sungah bawl ding hong kiphal nawnlo hi. Zomi tampi te tenna khuapi a hi Kalaymyo a om Kalay University ah zong sangnaupang te makaihna tawh Zomi namni bawl ding thu nei te in phalna a piak loh pen Zomi te minam beimangna ding kumpi te thumeilet khat a hih manin dah huai mahmah hi. Zomi nam ni pen Zomi te a dingin Kawl gam sungah minam khat hihna a hong lak bek hilo in, leitung bupah minam khat i hihna hong lak a hih manin tua ni beimangna ding hanciamna pen Zomi nam beimangna ding hanciamna a hihi.

 

Thu khupna:

 

Zomi nam ni a kibawl sim a kigen den thu in Zomi nam ni a hong pianna leh a deihna a hihi. Zomi nam ni a kibawl sim a i phawk kik ding thu tampi te sung pan in Zomi nam ni i deihna pen zong kisam pen khat in ka um hi. Abeisa hun lai in i makai masa te in i minam sungah thumanna (justice), tanh kikimna ( equality) leh suahtakna ( liberty) a om theihna ding ngimna tawh minam bup huam in thu leh la a vaihawm ni uh pen Zomi nam ni ding a kiciam teh a hihmanin, Zomi nam ni deihna pen i minam sungah tua thute a om theihna ding ngimna  ahi hi. Minam (nation) khat sungah namphung ( tribes) tampi om thei a, namphung ( tribe) khat sungah beh ( clans) tampi kigawm theih mah bangin  Zomi nam ( nation) sungah zong namphung ( tribes) tuamtuam tampi leh beh ( clans) tuamtuam tampi om hi.Tua beh leh phung tuamtuam tampi om te in thumanna ( justice), tanh kikimna ( equality) leh suahtakna ( liberty) a kikim tek a ngah tek theihna ding pen makai masa te ngimna a hihi. Tua bangin i beh i phung tawh kisai thu leh la te, paizia ngeina (customary laws) te leh huang sung huang pua te hoih tak a i kep cing theihna ding leh, lai leh ngeina kepcing theihna ding lunggulhna tawh Zomi nam ni a hong piang khia zong a hihi. Tua a hih manin i minam ngeina, lai leh kampau te hoih tak leh suakta taka kepcing theihna a om nawnloh ciangin Zomi hihna zong beimang ding hi. Leitung ah tua bangin minam mangthang tampi na om ngei khin a, mai lam ah zong a mau minam a kemcing lo te hong mang thang lai ding hi. Zomi nam te leitung ah minam mangthang a suahloh na dingin; (1) I minam tawh kisai ciaptehna te kemcing ding, (2) lai, kampau leh ngeina te kem cing ding, (3) Gam leh lei it in puah leh zuun ding, (4) Zomi naupang te in Zomi a hihna a theihna ding hilh in pantah ding leh (5) Ei mimal kivakhna tek tawh minam kepcing theihna ding nasem to leng Zomi pen leitung ah kipkho den zo ding hi.

 

« Older entries

Follow

Get every new post delivered to your Inbox.